Free songs
Home / सम्पादकीय / निष्ठापूर्ण राजनीतिका अथक योद्धाप्रति श्रद्धाञ्जली

निष्ठापूर्ण राजनीतिका अथक योद्धाप्रति श्रद्धाञ्जली

नेपालको इतिहासमै पहिलोपल्ट गठन भएको कम्युनिष्ट पार्टीको अल्पमतको सरकारका अर्थमन्त्री भरतमोहन अधिकारीको निधनले मुलुकले एक निष्ठावान् एवं भिजन भएको जनमुखी नेता गुमाएको छ । अधिकारीको निधनसँगै यतिबेला धेरै मानिसहरुले उहाँमा रहेको उच्चस्तरको सुझबुझ, क्षमता र ग्रामीण विकासमुखी दृष्टिकोणको प्रशंसा गरिरहेका छन् । स्व. अधिकारीले आफू अर्थमन्त्री हुँदा मुलुकलाई नयाँ दिशानिर्देश गर्नुभएको थियो । तत्कालीन कम्युनिष्ट सरकारको सफलताको श्रेय पाउने अग्रणी नेतामा स्व. अधिकारी पर्नुहुन्छ । अधिकारीको निधन राष्ट्रको लागि ठूलो क्षति हो । यस दुःखद घडीमा हामी उहाँप्रति हार्दिक श्रद्धाञ्जली अर्पण गर्दछौं ।

तत्कालीन अल्पमतको सरकारले शुरु गरेका लोककल्याणकारी राज्यको अवधारणा अनुरुपका कामहरुले अहिले पनि निरन्तरता पाइरहेका छन्, यसको प्रमुख श्रेय उहाँलाई नै जान्छ । सामाजिक सुरक्षा कार्यक्रमअन्तर्गत त्यसबेला बृद्धबृद्धाहरुलाई दिइएको एकसय रुपियाँ भत्ता अहिले बढेर दुई हजार पुगेको छ । यसले समाजका अशक्त र अपहेलित बृद्धबृद्धाहरुलाई ठूलो राहत दिइरहेको छ । यो कार्यक्रम शुरु गर्दा यसलाई राज्यले धान्न नसक्ने अति वितरणमुखी भएको आरोप लगाउनेहरुले समेत यसलाई रोक्न सकेनन्, निरन्तरता दिन बाध्य भए । राज्यको चरित्रलाई लोककल्याणकारी र जनमुखी बनाउने हो भने हरेक राजनीतिकर्मीले स्वर्गीय अधिकारीबाट सिक्न सक्नुपर्छ, प्रेरणा लिनुपर्छ ।

स्व. अधिकारीलाई ग्रामीण विकासमुखी अवधारणाका सफल प्रयोगकर्ता मान्न सकिन्छ । सात सालअघि र त्यसपछि पनि गाउँको विकासका धेरै कुरा भए । तर त्यसअनुरुप काम भएनन् । अधिकारीले अर्थमन्त्री हुँदा ‘आफ्नो गाउँ आफै बनाउ“’ कार्यक्रममार्फत् ग्रामीण तहसम्म पुग्ने गरी पहिलो पटक बजेट विनियोजन गर्नुभयो । जनतालाई विकासमा सहभागी गराउनका लागि ग्रामीण तहसम्म बजेट दिने परम्पराको थालनी उहाँ अर्थमन्त्री भएपछि नै भएको हो । गाउँको विकासविना मुलुकको विकास सम्भव छैन भन्ने कुरा उहाँले गहिरोढंगले बुझ्नु भएको थियो । नेपालको इतिहासमा अवसर पाएर पनि धेरै मन्त्रीहरुले काम गर्न नसकेका उदाहरण थुप्रै छन् । तर अधिकारी नै यस्तो पात्र बन्नुभयो, जो आफू मात्र सफल बन्नुभएन, अल्पमतको सरकार नौ महिनामै ढले पनि जनतामा ठूलो प्रभाव छोड्न सक्नुभयो ।
नेपालको संविधानले समाजवादी राज्यको अवधारणा स्वीकार गर्दै समाजवादतर्फ अगाडि बढ्ने लक्ष निर्धारण गरेको छ । तर हाम्रो समाजवादको मोडेल वा प्रारुप कस्तो हुने बारेमा ठूलो अलमल छ । न त यस सम्बन्धी गतिलो बहस नै हुन सकेको छ । यो बेला भरतमोहन अधिकारीले गरेका उदाहरणीय कामहरुबाट सिक्न र प्रेरणा लिन सक्नुपर्छ । विचार र निष्ठाको राजनीति ओरालो लागिरहेको अहिलेको अवस्थामा नाराले मात्रै समृद्ध नेपाल बन्ने छैन । यसका लागि सद्चरित्र र इमानदारिताको खाँचो पर्छ । स्व. भरतमोहन अधिकारीमा पदमा नरहेको र बिरामी भएको अवस्थामा समेत उहाँमा राष्ट्र र जनताप्रति ठूलो चिन्ता र जिम्मेवारीबोध थियो । उहाँले विभिन्न लेखहरुमार्फत् सरकार, नेताहरु, कार्यकर्ताहरुलाई एकताबद्ध भएर इमानदारितापूर्वक लाग्न घचघच्याइरहनु हुन्थ्यो । जिम्मेवारी पाएको बेला इमानदारितापूर्वक काम गर्ने र जिम्मेवारी नलिएको बेलामा समेत पथप्रदर्शक र उत्पे्ररकको भूमिका निर्वाह गर्न सक्ने स्व. अधिकारीका गुणबाट सबैले प्रेरणा लिन सक्नुपर्छ ।

स्व. अधिकारीले नेपाली समाज, राजनीति र अर्थनीतिको क्षेत्रमा ठूलो प्रभाव छोडेर संसार छोड्नु भएको छ । यस अर्थमा उहाँको जीवन सफल र सार्थक बनेको छ । उहाँले आजीवन निष्ठाको राजनीति गर्नुभयो । कहिल्यै विचलित र थकित हुनुभएन । एक अथक योद्धाका रुपमा आफ्नो जीवन राष्ट्र र जनताको हितमा समर्पित गर्नुभएका उहाँप्रति हाम्रो भावपूर्ण श्रद्धाञ्जली !

Loading...

About युगबोध

Leave a Reply

Your email address will not be published. Required fields are marked *

*

Scroll To Top